"Таза Қазақстан" акциясы: болашаққа жасыл аманат
12-13 ақпанда Қорғалжын мемлекеттік табиғи қорығының қызметкерлері "Таза Қазақстан" экологиялық акциясы аясында өскелең ұрпаққа табиғатты аялау дәстүрін қалыптастыру мақсатында маңызды бастама көтерді. Бұл шараға Жастар ресурстық орталығы белсенді атсалысып, жас буынның экологиялық санасын қалыптастыруға өз үлесін қосты.
Жасыл бастама – келешек ұрпақ игілігі үшін!
Қорғалжын мектеп гимназиясы мен Ақтан Төлеубаев атындағы орта мектеп оқушылары табиғатты қорғау ісіне тартылды. Табиғат жанашырлары балаларға ағаш өсірудің маңыздылығын түсіндіріп, қоршаған ортаны көгалдандырудың пайдасы туралы дәріс өткізді. Жастар ресурстық орталығының еріктілері де бұл бастамаға қосылып, оқушыларға көшет отырғызу әдістерін үйретті.
Тұқым – ертеңгі жасыл орман!
Қорық қызметкерлері таңдаулы ағаш тұқымдарын дайындап, оларды мектеп оқушыларына табыстады. Бұл тұқымдар болашақта үлкен саялы ағаштарға айналып, табиғаттың ажарын ашады. Жастар ресурстық орталығының мүшелері бұл шараға қатысып, табиғат қорғау жұмыстарының маңыздылығын насихаттады.
Көктемгі көгалдандыру маусымына дайындық!
Ендігі басты мақсат – көктемде көшеттерді отырғызып, оларды күтіп-баптау. "Таза Қазақстан" акциясы аясында қорық мамандары мен Жастар ресурстық орталығының белсенділері мектеп оқушыларымен бірлесе отырып, көктемгі көгалдандыру жұмыстарын жүзеге асыруды жоспарлап отыр.
Табиғатты аялау – ортақ міндетіміз!
Қоршаған ортаны қорғау – әр азаматтың парызы. "Таза Қазақстан" акциясы жастарды табиғатты сүюге, экологиялық мәдениетті қалыптастыруға шақырады. Көктемде ең көп көшет отырғызған мектеп анықталып, үздік табиғат жанашырлары марапатталатын болады. Табиғатты аялауға бірлесіп атсалысайық!
Жаманбаева Малика, Жастар ресурстық орталығының SMM-маманы